ភ្នំពេញ៖ និយាយលេងទៅកាន់ចៅទី ២០ ដែលស្លៀកពាក់ទាហ៊ាននិងកាន់កាំភ្លើងជ័រប្រភេទឧបករណ៍សម្រាប់កុមារលេងផងនោះ សម្តេចតេជោបានហាមចៅមិនឱ្យទៅលេងប្រទេសអាហ្រ្គានីស្ថានទេ។ សម្តេចតេជោ ហ៊ុន សែន បានប្រាប់ទៅកាន់ចៅទី ២០របស់សម្តេចថា “កុំទៅចៅព្រោះមហាអំណាចកំពុងរត់ចោលអាហ្រ្គានីស្ថាន ចៅទៅក៏ជួយអាហ្គានីស្ថានមិនបានដែរព្រោះប្រទេសមហាអំណាចកំពុងចាញ់រត់ទៅផ្ទះគេអស់ហើយ ម្យ៉ាងទៀតកាំភ្លើងចៅមិនទំនើបដូចកាំភ្លើងប្រទេសមហាអំណាចទេ។” នេះគឺជាការបង្ហាញសារបែបកំសាន្តរបស់សម្តេចតេជោ នៅមុនម៉ោងអាហារថ្ងៃត្រង់ ថ្ងៃអាទិត្យ ទី២៩ តាមរយៈទំព័រហ្វេសបុក។

សម្តេចតេជោ បានប្រាប់បន្ថែមទៅចៅរបស់សម្តេចថា “កុំទៅចៅ នៅជួយតា ប្រឆាំងកូវីដ-១៩ល្អជាង ចៅឆ្លើយថាពេលកូវីដម៉ាក់មិនឱយចេញពីផ្ទះទេលោកតា។ ល្អឡើងវិញ”។

គួររំលឹកផងដែរថា សម្តេចតេជោ ហ៊ុន សែន កាលពីល្ងាចថ្ងៃសៅរ៍ ទី២៨ ខែសីហា បានយល់ព្រមទទួលយកជនភៀសខ្លួនអាហ្វហ្កានីស្ថាន ចំនួន៣០០នាក់ជាបណ្តោះអាសន្ន មុននឹងធ្វើដំណើរទៅប្រទេសទី៣ តាមសំណើរអង្គការ The Asia Foundation ប្រចាំកម្ពុជា។

អង្គការ The Asia Foundation បានស្នើសុំមករាជរដ្ឋាភិបាលកម្ពុជា ដោយបញ្ជាក់ថា «ដោយផ្អែកលើគោលការណ៍មនុស្សធម៌ មេត្តាពិនិត្យនូវលទ្ធភាពផ្តល់ទិដ្ឋាការ ចូលព្រះរាជាណាចក្រកម្ពុជាដល់បុគ្គលិកអង្គការ The Asia Foundation ប្រចាំប្រទេសអាហ្វហ្កានីស្ថាន ដែលជាពលរដ្ឋអាហ្វហ្កានីស្ថាន និងក្រុមគ្រួសារ សម្រាប់រយៈពេលជាបណ្តោះអាសន្នក្នុងអំឡុងពេល ដែលពាក្យស្នើសុំជាជនភៀសខ្លួនកំពុងតែដំណើរការ»៕